Вчера, во Македонската опера и балет, свечено беа доделени нововостановените награди “Виртуози“ за особени достигнувања во областа на на класичната музика, што ги доделува Сојузот на композиторите на Македонија.
Годинешни, први добитници на наградата се: Ана Дурловски за најдобар музичко сценски уметник, а во категоријата меѓународна афирмација – Симон Трпчески е добитник на наградата „Виртуози“.
Најдобар камерен оркестар е „Мјузик прогресив квартет“. Марко Коловски ја доби наградата за своите достигнувања во областа на музичката публицистика. Македонската филхармонија доби награди во две категории: најдобар голем ансамбл и музички организатор. Најдобра музичка манифестација е „Денови на македонска музика“. Наградата “Виртуози“ за најдобар композитор ја доби Дарија Андоновска, а за музички изведувач Марија Вршкова. Награда за најдобар млад музичар му припадна на Дино Имери
За наградените одлучувало 11-члено стручно жири – музички и балетски уметници, педагози и теоретичари. Наградата е статуетка од авторката Виолета Коцев, која беше избрана на конкурс.
Според претседателот на СОКОМ Сони Петровски, целта на манифестацијата и наградата „Виртуози“ е да им се даде признание на уметниците, да се поттикнуваат на креативни проекти и да се афирмира класичната музика која е малку застапена во медиумите.
Манифестацијата ја отвори министерката за култура Елизабета Канческа-Милевска, а наградите на добитниците им ги врачија: Мелпомени Корнети, Велко Тодевски, Влатко Стефановски, Љубомир Бранѓолица, Оливер Белопета, Милка Ефтимова, Владимир Георгиевски, Драган Даутовски и Глигор Чемерски.
Пред публиката во МОБ настапија Женскиот хор при Младинскиот културен центар, младата виолинистка Ева Богоевска, пејачите Иван Наумовски и Наде Талевска и балерините Викторија Илиоска и Елена Ристеска.