Граѓаните нема да можат во Антикорупциската комисија да пријавуваат сомневања за финансиското работење на партиите, како што беше првично предложено. Според информации на НОВА, овој амандман на ВМРО ДПМНЕ е еден од 20 амандмани на опозицијата што ги прифати власта.
Антикорупциската комисија сега ќе може да почне постапка за испитување на финансирањето на политичката партија, но само по иницијатива на државни институции, здруженија на граѓани кои се занимаваат со владење на правото и политички партии.
За време на изборната кампања, иницијатива за да се испита незаконското финансирање на партиите до Антикорупциската комисија ќе може да поднесат акредитирани набљудувачи од невладините организации или од политичките партии.
Според информации на НОВА, а кои ги потврдија и од ВМРО ДПМНЕ и од СДСМ, останува можноста, Антикорупциската комисија да врши увид во банкарските сметки на функционерите, но доколку отвори истрага ќе мора да ја заврши во рок од два месеци. Во предложениот Закон немаше рок до кога антикорупциската комисија може да води постапка за одредено лице. Во ВМРО ДПМНЕ коментираат дека власта лажно ги обвинувала дека се противат на контрола на банкарските сметки, затоа што пред само две недели бил изгласан новиот Закон за ЈУП со кој Управата за јавни приходи доби право да има увид во сите банкарски сметки. Од ВМРО ДПМНЕ додаваат дека препораката од ГРЕКО била да нема поклопување на исти надлежности на повеќе институции.
Бројот на членови не се менува и Антикорупциската комисија ќе има 7 членови. Претседателот и членовите на комисијата ќе се избираат по исти критериуми – треба да имаат 10 годишно искуство во владеење на право и антикорупција и да не биле членови на политичка партија или пратеници.
И од СДСМ и од ВМРО ДПНМНЕ велат дека се задоволни од законското решение. За Законот ќе гласаат денеска во 16 часот.
Од двете партии потврдија дека за да се избере новиот состав на Антикорупциската пред одржувањето на претседателските избори ќе се скратат роковите за изборот на новиот состав. Претседателот на Собранието Талат Џафери најави дека на 8 февруари ќе ги распише изборите. До тогаш треба да се избере новиот состав. Огласот за пријавување на кандидати ќе биде објавен веднаш по изгласувањето на Законот и ќе трае од 7 до 10 дена – рок во кој кандидатите ќе можат да ги достават кандидатурите. По ова, ќе следува и јавно испрашување на пријавените кандидати од невладини и граѓански организации.