12.издание на Оф фест, вчера пред преполната Универзална го отвори Анушка Шанкар со својата група, која го претстави својот најнов проект, музика која е комбинација на древните индиски раги и стари шпански фламенко композиции.
Публиката беше воодушевена од мајсторската изведба на Анушка на ситарот, но кога некој од публиката извика „Пеј за нас Анушка!“, таа одговори: „Нема шанси, затоа имам пејачка“.
Шанкар е една од водечките фигури на т.н. музика на светот. Нејзиното творештво влече корени од индиската класична музика како и од музиката на нејзиниот татко, легендарниот Рави Шанкар, кај кого таа се школувала од својата деветта година.
Како композиторка, ја истражува плодната синтеза на индиската музика со разните музички жанрови, фламенко, електроника, џез и класична музика.
Двапати е номинирана за престижната награда „Греми“. Таа е најмладата музичарка и првата жена во историјата на „Греми“, која е номинирана во категоријата „светски музички албум“ за изданието „Во живо во Карнеги хол“” (2002), а подоцна и првата индиска музичарка што бележи настап на доделувањето на „Греми“ наградите (2006), кога беше номинирана за албумот „Рајз”.
Вечерва на Оф фест, публиката ќе ги слушне турската група „Таксим трио“ и македонскиот проект на Горан Трајковски и Елена Христова, „Биоскопиа“.
Посетителите на концертот во анкетата на НОВА, велат дека фестивалот е ретка можност да се слушнат светските музичари, бидејќи македонските медиуми не пуштаат ваков вид музика. „Квалитетот е изгубен за сметка на комерцијалното“, велат тие.