Режисерот Игор Иванов Изи ја најави премиерата на својот нов филм „Соба со пијано“ за отворањето на 34. издание на фестивалот на филмска камера „Браќа Манаки“.
„Оваа студија на епизодни карактери, поместена на единствена локација е огледало на сета хипокризија, апсурд и на сета декаденција на генерацијата на која припаѓаме и искрено верувам дека со сопствената актуелност, естетска рамка и со уникатноста ќе успее да допре до различните генерациски, социјални и културни нивоа на македонската кино-публика.
„Соба со пијано“ обединува извонредна интернационална авторска и актерска екипа на која сум бескрајно благодарен на безрезервниот влог во проектот, особено во
доменот на актерската игра, на фотографијата и на музиката, кои на проектот му
овозможуваат вонредна артистичка и продукциска вредност“, вели Изи.
Филмот е работен по сценарио на Жанина Мирчевска и режисерот Игор Иванов, продуцент е Томи Салковски, кој е и директор на фотографија. Сценограф е Миленко Јеремиќ, оригиналната музика е на Чили Гонзалес. Филмот е копродукција меѓу македонската продуцентска куќа „Скопје филм студио“ и партнери од Словенија и Србија.
Во главните улоги настапуваат познатиот српски актер Светозар Цветковиќ и македонските актери Јовица Михајловски, Наташа Петровиќ и Васил Зафирчев.
Филмот „Соба со пијано“ е приказ на различни животни судбини доведени на оваа единствена локација од чиј ракурс можат да се допрат најсуштествените аспекти на нашето постоење. Фрагментите од животите на овие „егзистенцијалистички“ карактери се сосем доволни пред нашите очи да истече целиот нивен животен пат.
Мотивите се претвораат во фрустрации, амбициите и мечтите водат кон пропаст. Иако нималку слични, претставници на сосема различни социјални и културни групи, овие ликови се обединети во бесмислата на животот.