Арапските лидери, кои денеска се сретнаа во Каиро, соопштија дека го прифатиле планот на Египет за иднината на Појасот Газа и ја повикаа меѓународната заедница и финансиските институции брзо да го поддржат.
Египет го претстави својот план за Газа на самитот на арапските земји, согласно кој Хамас ќе се маргинализира и ќе се создадат привремени органи на власта под управа на арапски, муслимански и западни држави.
Планот е спротивен на иницијативата на американскиот претседател Доналд Трамп, кој предложи создавање на „Ривиера на Блискиот Исток“, проект кој вклучува масовно преселување на Палестинците и американска реконструкција на Газа.
Египетскиот план предвидува формирање мисија за помош во управувањето, која би ја заменила власта на Хамас во Газа на неопределен период, со задача да обезбеди хуманитарна помош и да почне реконструкција, се наведува во нацртот во кој имале увид некои светски агенции.
Портпаролот на палестинската милитантна организација Хамас, Хазем Касем, денеска изјави дека групата ќе го прифати само планот на арапските земји за повоена реконструкција на Газа, што ќе добие поддршка од Палестинците во енклавата.
-Нашиот став е јасен – сите планови за иднината на Газа… мора да се постигнат со национален консензус, а ние ќе го олесниме процесот, рече Касем за турската агенција Анадолија.
Тој додаде дека, што се однесува до плановите за повоена Газа, „Хамас не мора нужно да биде дел од овие аранжмани, ниту пак е воопшто заинтересиран да биде вклучен во нив“.
Касем, исто така, рече дека Хамас нема да биде „пречка за какви било аранжмани постигнати со национален консензус, што ќе доведе до почеток на обновата“ на Газа.
Тој додаде дека Палестинците „се способни да најдат пристапи засновани на консензус со арапска поддршка за да ја постигнат оваа цел“.