На програмата на „Мајски оперски вечери“ на сцената на МОБ, вечерва, ќе биде изведена операта „Атила“ од Џузепе Верди, со која ќе биде и одбележана 200-годишнината од раѓањето на композиторот. „Атила“ е опера со пролог и три чина, со либрето работено од Темистокле Солера врз база на драмскиот текст „Атила, крал на Хуните“ од Захаријас Вернер, кој првпат е изведен во 1809 година. Операта ја доживеала својата прва изведба во Венеција на 17 март 1846 година.
Норман Виџаја од Индонезија е диригент на претставата, а од Србија гостуваат режисерот Дејан Миладиновиќ, сценографот Александар Златовиќ и костимографот Миланка Берберовиќ. Концерт-мајстор е Верица Ламбевска.
Публиката во насловната улога на Атила ќе го види басот Иван Томашев од Србија, ликот на Ецио ќе го толкува баритонот Нико Исаков од Бугарија, ликот на Одабела сопранот Сања Керкез од Србија, додека тенорот Никола Китановски таа ќе го види во улогата на Форесто. Ликот на Улдино ќе го толкува тенорот Зоран Даскаловски, додека басот Диме Петров ќе настапи во улогата на папата Леоне.