По објавените кандидатури на Шведска и на Финска за влез во НАТО, министерот за надворешни работи на Австрија, Александар Шаленберг денеска рече дека неговата земја не планира да се приклучи на воената алијанса.
„Имаме сосема поинаква географска ситуација. Имаме многу поинаква историја и верувам дека тоа едноставно мора да се земе предвид“, изјави Шаленберг на маргините на состанокот на министрите за надворешни работи на ЕУ во Брисел.
Сепак, тоа не значи дека Австрија е политички неутрална.
„Нема неутралност во војна за агресија“, рече тој, мислејќи на руската инвазија врз Украина. „Зазедовме многу јасен став, ги поддржуваме сите санкции и правиме што можеме од наша страна во однос на поддршката, додаде шефот на австриската дипломатија.
На прашањето дали безбедноста на Австрија може да се гарантира и покрај тоа што останува надвор од НАТО, Шаленберг рече дека Австрија има намера да ги зголеми инвестициите во својата безбедност.
„Беше важно да се сфати дека светот не е толку пријателски како што би сакале да биде“, рече тој, додавајќи дека има држави кои биле подготвени да употребат воена сила за да ги задоволат своите интереси.