Сите резерви на нафтени деривати, и државни и оперативни се полни, а испораките се прават редовно, рече денеска министерот за економија Крешник Бектеши.
Министерот потенцираше дека нема да има недостаток на гориво и дека цената на горивата во Северна Македонија ќе остане најниска во регионот. Во однос на шпекулациите што се појавија овие денови дека трговците со нафта и нафтени деривати чуваат резерви со цел да ги продадат по повисоки цени, Бектеши е дециден дека инспектори на Финансиска полиција, УЈП и Државен пазарен инспекторат се излезени на терен и контролираат.
Нема колони на бензинските пумпи. Нема простор за грижа, не треба да се создава паника, имајќи предвид дека во континуитет во Северна Македонија, сите трговци, сите диструбутери, сите увозници имаат доволно испорака, согласно потрошувачката која е редовна во нашата држава, наведе министерот за економија.
Бектеши денеска беше во обиколка на големите трговски центри во Скопје. Се контролира и работата на маркетите, по информациите во јавноста дека трговците ги празнеле рафтовите со производи. Првичната оценка е дека трговците ја почитуваат мерката на Владата, за замрзнатите маржи, но сепак растат набавните цени на производите.