Белгија денес изгласа закон за еутаназија на деца. Со 88 гласа за, 44 против и 12 воздржани беше усвоен законот со кој еутаназијата се проширува и на деца. Еутаназијата во Белгија е дозволена од 2002 година.
Законот ја доби поддршката на социјалистите, либералите, екологистите и националистичката партија на Фландрија. Некои пратеници од овие партии сепак одлучија да не год адат својот глас.
За време на гласањето од делот во кој седи публиката се слушна извик «убијци» а тоа лице беше отстрането од салата.
За разлика од Холандија каде што еутаназијата за деца е дозволена од 12 години возраст, белгиските пратеници се одлучија за поинаква дефиниција според која еутаназијата може да биде извршена кај детето кое има капацитет да расудува. Тој капацитет мора да дозволи детето да разбере што значи «неповратната страна на смртта». Секоја одлука ќе биде донесувана случај по случај од страна на медицинска екипа, психијатар и независен психолог. Доколку иницијативата за еутаназија дојде од самото дете, родителите треба да дадат согласност.
Белгиските бискупи изразија жалење поради оваа одлука. Тие стравуваат дека законот ќе биде еден ден проширен на хендикепирани лица или ментално болни па дури и оние кои се уморни од животот, велат бискупите во нивното соопштение.