Главниот град Киев сè уште е под украинска контрола, изјави претседателот на Украина, Володимир Зеленски, додавајќи дека успешно ги одбиваат непријателските напади.
– Борбите продолжуваат. Веќе имаме речиси целосна поддршка од земјите на ЕУ за исклучување на Русија од СВИФТ. Се надевам дека Германија и Унгарија ќе имаат храброст да ја поддржат оваа одлука. Имаме храброст да ја браниме нашата татковина, да ја браниме Европа, рече тој во видео пораката објавена на социјалните мрежи.
Одлуката за исфрлање на Русија од глобалниот платен систем SWIFT ќе биде донесена во следните неколку дена, изјави за западни медиуми еден од гувернерите на централна банка во ЕУ.
– SWIFT е само прашање на време, тоа ќе се случи наскоро, во наредните денови, рече еден од 27-те гувернери од земјите-членки на Европската централна банка, кој сакаше да остане анонимен, додавајќи дека таквата одлука е апсолутно неопходна.
Санкциите воведени против Русија нема да сменат ништо, операцијата да се заштити Донбас ќе биде спроведена во целина, изјави денеска заменик-претседателот на рускиот Совет за безбедност, Дмитри Медведев.
– Овие санкции дефинитивно нема да сменат ништо. Тоа им е јасно дури и на неупатените во Стејт департментот. Ова се однесува на одлуката да се спроведе воената операција за заштита на Донбас, рече Медведев.
Тој нагласи дека операцијата ќе биде целосно спроведена се додека не се исполнат целите што ги определи рускиот претседател.
Медведев исто така рече дека Русија ќе одговори на заплената на парични средства на руските граѓани и компаниите во странство, на начин што ќе бидат запленети парите на странците и странските компании во Русија.