Високиот претставник на ЕУ за надворешна политика на платформата Икс порача дека крвопролевањето во Појасот Газа мора веднаш да запре.
По денешниот напад на Израел врз централното подрачје на Појасот Газа во кампот Нусејрат, каде што според палестинските власти загинале 210 лица, а околу 400 се здобиле со повреди, претставникот на Европската Унија, Жозеп Борел, порача дека секое убиство на цивили е за осуда и дека крвопролевањето мора итно да запре.
-Извештаите од Газа за уште еден масакр на цивили се ужасни. Планот во три фази на американскиот претседател е патот до траен прекин на огнот и крај на убиствата, напиша Борел.
Израелската армија соопшти дека во операција во централниот дел на Газа биле ослободени четворица заложници киднапирани од Хамас, а израелската акција ја поздравија американскиот претседател Џозеф Бајден и францускиот претседател Емануел Макрон.
Бајден го повтори барањето на Вашингтон за постигнување договор за прекин на огнот велејќи дека тоа ќе обезбеди ослободување на сите преостанати заложници заедно со безбедносни гаранции за Израел и помош за невините цивили во Газа.
И францускиот претседател Макрон повика на изнаоѓање начин за смирување на состојбата, но упати и критики за ситуацијата во Рафах, на југот на Газа. Тој рече дека бројот на загинати и повредени по девет месеци војна е неприфатлив.