Обвинителството во Милано, како дел од истрагата за „викенд-снајперисти“ за време на опсадата на Сараево, побара и увид во сведочењето на американскиот пожарникар Џон Џордан, кое го дал во 2007 година пред Хашкиот трибунал за воени злосторства во поранешна Југославија.
Неговото сведочење, старо повеќе од 18 години, е повторно релевантно бидејќи може да фрли светлина врз улогата на странските државјани, таканаречените туристички снајперисти, кои, според сведоците, биле платени да убиваат цивили за време на агресијата врз Босна и Херцеговина и опсадата на Сараево, објави Кликс.ба.
Џордан во Хаг изјави дека, за време на престојот во Сараево, неколку пати видел луѓе кои „не личеле на локални жители“.
Од облеката, оружјето што го носеа и начинот на кој се движеа, беше јасно дека не се од тука. Ги водеа локални луѓе, речиси како водичи, рече Џордан.
Според неговото сведочење, тој забележал слични сцени во близина на Мостар. Пристигнал во Босна и Херцеговина како доброволен пожарникар кој сакал да им помогне на цивилите погодени од војната. За време на спасувачката операција, самиот бил ранет.
Кога тогашниот судија, Патрик Робинсон, го прашал дали може да направи разлика помеѓу домашните и странските борци, Џордан одговорил потврдно:
Можам. Обучен сум да набљудувам детали. Беше очигледно дека овие мажи буквално беа водени за рака низ области со кои не биле запознаени рекол тој.
Исто така, опишал како биле обучени „туристичките снајперисти“.
Носеа комбинација од цивилна и воена облека. Но, она што ги издвојуваше беше нивното оружје. Локалните борци имаа препознатливи видови оружје, додека овие странци користеа пушки што повеќе личеа на ловечко оружје, да речеме за лов на диви свињи во Црната шума, отколку на оружје за борба во урбани услови. Беше јасно дека беа надвор од контекст – странци, аматери, но опасни.
Џордан, исто така, пред судот зборуваше за начинот на кој тие снајперисти ги избирале своите цели.
Во некои напади, забележав дека најчесто ги таргетираа најмладите членови на семејството. Ако возрасен и дете одеа заедно, детето беше погодено. Во група девојчиња, целта често беше најатрактивното. Не знам зошто. Само Бог знае. Но, ако сакате да уништите едно семејство, погодете го детето – тоа ги здробува сите други, објасни тој.
Обвинителството во Милано, предводено од обвинителот Алесандро Гобис, сега сака да ги собере сите документи и сведоштва што му се достапни на Хашкиот суд, со цел да ги истражи наводите за евентуално учество на италијански државјани во злосторства за време на опсадата на Сараево, пишува Ла Република.
Според достапните информации, истрагата вклучува и документи од поранешната италијанска разузнавачка служба СИСМИ (сега АИСИ). Врз основа на сведочењето на босански разузнавачки службеник, СИСМИ наводно имал сознанија за присуството на италијански државјани за време на војната во Босна и Херцеговина на „викенд-снајперисти“, а во некои случаи се обидувал да ги спречи да одат на бојното поле.
Во Италија беше отворена истрага против „викенд-снајперисти“ кои, за време на агресијата врз БиХ, им платија на окупаторите на Сараево да пукаат врз жителите на опколениот град.
Обвинителите имаат за цел да ги пронајдат организаторите на „викенд-тури“ и луѓето кои им платиле да одат и да убиваат невини граѓани на Сараево за забава.
Истрагата, за која „Ил Џорнале“ објави претходно ова лето, ја отвори обвинителот Алесандро Гобис под обвинение за намерно убиство отежнато со суровост и со злобни мотиви.
Опсадата на Сараево започна на 5 април 1992 година и траеше 1.425 дена – до 29 февруари 1996 година.
Во тој период, градот беше изложен на секојдневно гранатирање и снајперски оган од позицијата на големосрпскиот агресор.