Шефот на европската дипломатија, Жосеп Борел денеска одново предупреди на глобалниот недостиг на храна поради војната во Украина, која е еден од најголемите светски производители на житарици, бидејќи житото ниту може да се извезува, ниту да се сади и жнее поради воените дејствија.
„Има недостиг од храна и тоа ќе продолжи. И кога ја има, таа е скапа, многу поскапа отколку што многу луѓе можат да си дозволат“, рече Борел на прес-конференција по состанокот на министрите за развој на ЕУ.
„Доколку засегнатите луѓе трошат повеќе за храна, тогаш имаат помалку за образование и за здравје, а тоа ќе ја продлабочи сиромаштијата и нееднаквоста“, додаде Борел.
Министрите за развој на ЕУ денеска одлучија да „поддржат повеќе од 70 партнери“ за да се подобри „отпорноста и одржливоста на нивните системи за храна со цел да го зголемат нивниот капацитет за храна на среден рок“, кажа високиот претставник на Унијата за надворешна политика и безбедност.
„Ги повикуваме и нашите партнери да не ја ограничуваат глобалната трговија со земјоделски производи“, додаде Борел.
Борел, исто така, нагласи дека причината за претстојната криза со храна е руската инвазија на Украина, а не санкциите на ЕУ кон Русија, како што тврди Кремљ.
„Русија во моментот го блокира извозот на 20 милиони тони жито од Украина, пред сè, во Северна Африка и Азија“, наведува германската Влада, што предизвика раст на цените.