Труењето на поранешниот офицер на КГБ, Александар Литвиненко, најверојатно е одобрено од претседателот на Русија, Владимир Путин, се вели во извештајот на независната британска истрага предводена од пензионираниот судија Роберт Овен.
Извештајот е напишан на 328 страници и во него се поврзуваат смртта на Литвиненко во 2006 година со највисоки претставници на Кремљ.
– Имајќи ги в предвид сите докази и анализи, откриваме дека акцијата на руското Федерално безбедносно биро да се убие Литвиненко е одобрена од тогашниот шеф на службата, Николај Патрушев и самиот претседател Владимир Путин.
Литвиненко беше дојавувач (whistle-blower) кој се бореше со корупцијата во безбедносните служби на Русија.
Неговата сопруга, веднаш по објавувањето на извештајот, рече дека е среќна што англиските тела ги потврдиле зборовите на смртна постела на Литвиненко, дека Путин стои зад неговото труење.
Поранешниот офицер на КГБ почина на 43 години, 22 дена откако консумираше зелен чај “зачинет“ со полониум, редок токсичен изотоп, во Милениум хотелот во Лондон, по што експресно беше пренесен во болница.
Полониумот важи за супстанца која речиси исклучиво може да се најде во Русија.
Најпрво за неговото убиство беа обвинети двајцата соработници со кои се сретнал истата ноќ во хотелот, а потоа независната истрага наведе дека “можна е вмешаност на руските агенции во смртта на Литвиненко“ како и “можна е вмешаност на британските разузнавачки служби“.
На смртна постела, Литвиненко, кој важеше за критичар на Кремљ, го обвини Путин за неговата ситуација.
– Можеби ќе успееш да замолчиш еден човек, но масата протести од целиот свет ќе откликнува во твоите уши господине Путин, до крајот на животот, рече Литвиненко.
Тој заедно со неговата сопруга Марина и синот Анатоли живееја во Велика Британија од 2000 година, а неговата сопруга рече дека тој работел како агент за британската МI6 разузнавачка служба.
Извештајот на Овен од друга страна е направен со сведоштва и интервјуа со 62 сведоци но нивните сведочења не се вклучени во финалниот извештај бидејќи се тајни.