Младите се иселуваат од државата, нацијата старее, наталитетот се намалува. Ваквата појава е доста изразена во помалите населени места низ земјата. Бројките од Државниот завод за статистика се застрашувачки. Падот на наталитетот во некои општини изнесува над 60 проценти, што претставува загрижувачки факт.
Општините Валандово и Радовиш од југоисточниот регион во континуитет се соочуваат со пад на живородени деца. Па така на пример, ако ги земеме бројките од последните три години, во Валандово во 2011 година се родиле 116 деца, за во 2013 да има 106 бебиња. Во Радовиш пак во 2012 година бројката на новородени била 374, за во 2013 година да се намали на 357 новороденчиња.
Зголемен број на новороденчиња може да се забележи на југот од земјата. Во Гевгелија во 2011 година има 183 живородени деца, а во 2013 бројот е зголемен на 212 новороденчиња. За разлика од Гевгелија, општина Струмица се соочува со огромен пад на наталитет. Во градот под Царевите кули според податоците, за половина век бројот на новороденчиња во е намален над 60 отсто. Во 1962 година имало 1.872 родени деца, а во 2013 година само 685 бебиња.
Но, ваквите бројки околу падот на наталитетот и се поголемиот број на бракоразводите не им звучат чудно на граѓаните на Струмица, ако се земе во предвид, како што велат, беспарицата во денешно време. Според нив, ретко некој денеска помислува на проширување на фамилијата.
„Ние сме во брак веќе 5 години, немаме деца. Можеби ќе звучи тажно, но се уште не помислуваме на нов член. Како прво, живееме и опстануваме со една плата, што значи едвај го крпиме месецот. Од што би го издржувале детето, подобро да не се мачи и тоа. Иста е состојбата и со влегување во брачна заедница, денес младите се поретко размислуваат на брак, токму заради немањето финансиска сигурност“, изјавија брачниот пар Николови.
„Имаме едно дете, но денес е многу тешко и со едно, а не со повеќе како што можеме да видиме во кампањата од страна на Владата. Ние сме свесни дека семејството е најбитно, но нека издржуваат тие повеќе деца со плати од 200 евра. Во оваа ситуација гледаме спас само надвор од државата, за жал тоа е вистината“, вели 30-годишниот Горѓи од Струмица.
Повозрасните граѓани кои ги прашавме велат дека не им е чудно што младите денеска така размислуваат. Пензионерот чичко Трајчо, смета дека и во иднина се помалку ќе се раѓаат дечиња.
„Младите бегаат од овде,од целата држава, бараат спас надвор по светот, каде ќе биде платен нивниот труд. Овде немаат шанса да се вработат, а уште помалку да размислуваат за фамилија. Како што стојат работите, овде ќе останеме само пензионери и дури тогаш ќе се прашуваме што не снајде. Жално е што се потешко младите одлучуваат да стапат во брак, а немањето пари знаеме дека носи и проблеми во бракот, па од тука и се поголем е бројот на разводи“, вели чичко Трајчо.
Слична е состојбата и со склучување на бракови и разводи.
Во 2013 во Струмица година биле склучени 420 бракови, наспроти 80 разводи, за разлика од 2012 каде имаме уште помал број на склучени бракови, односно 382, а вкупно 61 развод.
Тенденцијата на пад на бројот на склучени бракови во изминативе години е изразена во повеќето населени места во југоисточниот регион.
Доктор Љубинка Вета, невропсихијатар, за НОВА вели дека порастот на разводите е само уште една од транзициските детски болести која го зафати и македонското општество.
„Лесно е да се заклучи зошто денес има повеќе разводи за разлика од порано. Тоа е заради фактот дека луѓето се економски независни, не се спремни за жртвување и повеќето се себични кои во фокусот ги имаат сопствените интереси. Денешните млади кои стапиле во брак имаат проблеми во брачната заедница заради лоши навики кои им го нарушуваат односот како сопружници или пак избираат погрешна личност која не ги исполнува нивните емотивни или интелектуални потреби. Најчесто на ова листа се личности кои се зависници од алкохол, дрога, а одбиваат секаква помош. Неверството е исто така една од главните причини за развод на бракот, како и насилството. Многу млади брачни парови заради лоша егзистенција, или невработеност, нерешено станбено прашање живеат во заедница со родителите, што исто така е една од причините“, вели Вета.
Стручните лица за НОВА додаваат дека одлуката за развод е голема и бара сериозна реорганизација на системот и личното живеење. Социјалниот работник Билјана Мицева вели дека вo принцип, на секој развод му претходат 2-3 години дисфункционален брак со честа виолентност, со претходни чести раздвојувања и спојувања.
„Најчесто причини за развод се нeдоволна или прекината вербална комуникација, доживување дека сопругот или сопругата го спречува или го гуши во личниот развој, потоа вонбрачните врски, љубомората, зависност алкохол, дрога, насилство. Но постојат и причини кои се поврзуваат со поголем ризик за развод како што се брак во млади години, развод на родители, повторни бракови, предбрачна бременост и брак без деца“, вели Мицева.
Познавачите на оваа тема велат дека жените почесто покренуваат развод, но мажите потешко го прифаќаат крајот на бракот. Тие додаваат дека во 60 проценти при покренат развод еден од партнерите е во дилема и бара одложување на разводот, како и шанса да се обидат повторно.