Европскиот единствен број за итни повици „112“ веќе функционира и во земјава. Од 11 февруари наместо граѓаните да ги „вртат“ броевите 192, 193, 194 и 195, за полиција, брза помош, противпожарна единица или Центарот за управување со кризи, сега имаат можност со вртење само на овој број, да можат да ја добијат потребната помош од било која од овие институции и служби.
Праксата од првите два месеца функционирање на „112“, покажала дека граѓаните ја препознаваат важноста на овој број и каква услуга можат да ја добијат преку истиот, иако имало и има јавувања поради незнаење а во некои случаи и намерно, на овој број да се прашува и да се бараат разни други услуги, вели Тони Костов раководител на одделение за управување со повиците кон „112“.
За НоваТВ, Костов открива некои од поспецифичните јавувања во овој период. Па така некој се јавил да бара помош дека му е украдено возилото, зашто не било на местото каде што го паркирал. По направена проверка се утврдило дека возилото всушност му го дигнала пајак – службата поради неправилно паркирање. Некои од јавувањата биле за барања од комуналната сфера, некои затоа што немале доволно кредит за разговор на телефонот.
„Од 11 февруари до денеска на „112“ се регистрирани 92 000 повици, од нив 60 отсто се повици кои биле без конкретно барање а 40 отсто се функционални повици, кои претежно се барање помош од полицијата и Брза помош. Има и барања до Центарот за управување со кризи како и за интервенција на Бригадата за противпожарна заштита. Само за пожарот кај „Треска“ за 10 минути имавме 70 повици, вели за НоваТВ, Костов.
Почнувајќи од 11 февруари, за тој месец, имале 700 повици во просек дневно, а за март кога системот е достапен за цела држава, просечниот број на повици е 1800 во текот на 24 часа, а за април до сега статистиката вели во просек дневно биле примани по 1450 повици.
Дел од овие повици биле и злонамерни, вели Костов со цел да се блокира системот а дел од нив биле дури и заканувачки до некои од операторите. Таквите повици и лица се ставаат на „црна листа“ по што се процесуираат од страна на надлежните институции.
На бројот „112“ помош барале и странци, во тимот кој засега брои 38 луѓе очекувано има и членови со познавање на повеќе странски јазици. Луѓето кои се со пречки во говорот а се во ситуација да побараат помош на овој број, тоа можат да го направат со испраќање на СМС порака.
Во тек е екипирањето на уште 7 центри во земјава во сите поголеми градови.
Од службата апелираат: Јавувајте се на бројот „112“ само кога имате реална потреба од полиција, Брза Помош, од Центарот за управување со кризи или од противпожарната бригада. Не ги блокирајте линиите затоа што секунди можат да бидат важни за спасување на човечки животи.
(М.Трпческа)