Фондацијата „Бугарска меморија“ ги избриша фотографиите од директорката на техничкото училиште во Битола, Жанета Сервини и заменикот Љупчо Здравковски, како и дел од текстот каде се споменуваа во објавата на интернет страницата на Фондацијата.
До вчера во истата објава дека македонски студенти „кои се истомисленици“ на клубот „Иван Михајлов“ се во посета на Бугарија, пишуваше дека таму пристигнале и првите луѓе на техничкото училиште „Ѓорги Наумов“, Битола кои го посетиле приватното основно училиште „Цар Симеон Велики“ во село Ивањане. Денес овој дел од информацијата е избришан и Сервини и Здравковски веќе не се спомнуваат во објавата.
Дополнително, Фондација денес излезе со информација дека ги осудува неправедните обвинувања во медиумите кон директорите и дека е чиста случајност тоа што нивната посета на приватно училиште се поклопила со посетата на македонски студенти на покана на Милен Врабевски и бугарската фондација.
„Г-ѓа Сервини и г-ин Здравковски беа во Бугарија на покана на приватно училиште ‘Цар Симеон Велики’ за планирање на заеднички проекти според Еразмус + програмата. Нагласуваме дека двете не се дел бугарското здружение во Битола. Тие никогаш и не беа и никогаш не кажавме никаде дека е тоа така“, напишаа денес од Фондацијата.
Во меѓувреме и директорката Сервини, а и техничкото училиште се огласија со демант дека се дезинформации објавите во некои македонски медиуми за присуство на ученици од техничкото училиште од Битола во Бугарија.
„Ја отфрламе поврзаноста со учениците, спомнати во веста. Во Софија бевме отидени јас и заменикот директор Здравковски Љупчо за да воспоставиме Еразмус + соработка со училишта во Софија, како што впрочем е и практиката на сите други училишта“, наведоа во демантот.