Бугарскиот премиер Кирил Петков и државната потпретседателка Илијана Јотова, како и актуелната и претходната министерка за надворешни работи Теодора Генчовска и Екатерина Захариева и Костадин Костадинов од руската партија во Бугарија, викендов ќе престојуваат во Битола и во Охрид.
Посетата и активностите се во сопствена режија, со што немаат карактер на работна или официјална државна посета.
Како што сме информирани од претставници на Здруженијата на македонските Бугари во земјава, повод за посетата е отворање на клуб во Битола од истоименото здружение „Иван Михајлов“ и читална во Охрид.
Како што сега стојат работите, според сеуште непотврдени информации, бугарскиот премиер Петков ќе допатувал со хеликоптер и би присуствувал само на активностите во Битола по што веднаш би се вратил во Софија.
Сите останати ќе оделе во недела во Охрид каде ќе се отворела читална.
Посетата е во функција на промовирање на повеќе проекти за бугарската заедница овде меѓу кои и проектот да се донесе литература, книги и весници на бугарски јазик за опремување на читалната во Охрид.
Во пресрет на оваа активност, денеска бугарскиот претседател Румен Радев ја потсети власта во Софија на ветувањето дека ќе го почитувала националниот договор а со тоа и ставот на партијата на Радев за предусловите што требало да ги исполни Република Северна Македонија за укинување на ветото за почеток на претпристапните преговори со Европската Унија.
(М.Трпческа)