Претседателот во оставка на Комисијата за 24 декември Борче Давитковски кој учествува на средбата во Клубот на пратениците соопшти дека се договориле да продолжат со работа и утре, кога ќе се одржат одделни средби на Давитковски и странскиот експерт со СДСМ и ВМРО-ДПМНЕ.
Доколку постои потреба, средба ќе има во четврток а Давитковски се надева дека до петок веќе може да се очекува решение.
На новинарско прашање дали е оптимист и дали постои политичка волја, Давитковски изјави:
-Веќе пет часа сме тука за да дојде до решение, а ме замолија мене, во интерес на државата сепак да присуствувам на оваа средба.
Пред почетокот на средбата изјавите кои ги дадоа лидерот на опозицијата и премиерот навестија дека консултациите ќе бидат долги и макотрпни.
„Очекувам резултат од дијалогот и се надевам дека СДСМ ќе ја препознае важноста, пред се за државата, од успешното завршување на овој дијалог, ќе ги надмине теснопартиските интереси и ќе успееме во наредните четири дена да дојдеме до решение“ изјави премиерот Никола Груевски пред денешниот состанок на ад хок Комисијата за расчистување на настаните од 24 декември.
“Очекувам комисијата да констатира дека на 24 декември имало уставни прекршувања”, изјави лидерот на СДСМ Зоран Заев.