Пејачот Ламбе Алабакоски се уште е во полициската станица во Битола и чека да биде изведен пред судија на претходна постапка. Тој во целост го признал палењето на влезот на бугарскиот културен центар „Иван Михаилов“ во Битола. Бил уапсен синоќа, во својот дом. Порталот независен.мк пак пренесе информација од тамошниот дописник дека Алабакоски бил со мали изгореници на рацете и дека всушност тие биле причината за сомневањето да падне на него. Информацијата, сепак е неофицијална и не е потврдена од битолската полиција.
Она што е интересно е што наредниот ден Алабакоски пеел на музичката манифестација „Фолк фест Валандово 2022“, каде што ја извел фолк композицијата „Нема збогум“.
Македонската јавност, инаку, го запозна Ламбе Алабаковски пред 17 години преку музичкото шоу „Потрага по ѕвезди 2004“. За многу кратко време младото момче кое е инаку родум од село Љубојно стана миленик на македонската публика. Неговиот прв хит „Спаси ме“, компониран од страна на познатиот македонски композитор Дарко Димитров го вивна во ѕвездите.
Во 2005 тој ја сними својата втора песна „Каде песно моја“, компонирана од Славе Димитров. Во 2005 година Ламбе заедно со Александра Пилева отпатува во Брашов, Романија каде учествуваше на фестивалот „Golden Stag“. Во октомври истата година учествуваше на домашниот фестивал „Макфест“, каде што ја промовираше својата песна „Ех, да можам“.
Ламбе во 2013 година се ожени со својата девојка Магдалена, со која имаат два сина. Неколку години живееше во Флорида, САД, но лани заедно со своето семејство се врати во Македонијакаде ја продолжи кариерата.
Ламбе беше дел и од концертот „Засекогаш во срцата“ посветен на починатите музички великани Тоше Проески и Аки Рахимовски. Во организација на Центарот за култура Битола и Камерниот оркестар Битола двата концерти беа одржани пред бројната публика на 18 и 19 февруари.
Пејачот требаше да биде гостин на претстојниот концерт на „Меморија“ што ќе се одржи на 11 јуни на стадионот на АРМ во Скопје. Ламбе беше дел и од официјалната прес-конференција и се пофали дека ќе пее заедно со култниот бенд.
„Горд сум што ќе бидам дел од најголемиот концерт ова лето“, напиша Алабаковски, а фановите коментираа дека едвај чекаат да го видат и слушнат во живо. (Р.Н.)