„Разновидност во дијалог, слободен проток на идеи преку збор, креативност и иновација. Светскиот ден на поезијата е покана да се размислува за моќта на јазикот и целосен развој на креативните способности на секој човек“, пишува во пораката на генералниот директор на УНЕСКО Ирина Бокова по повод Светскиот ден на поезијата 21 Март.
Бокова истакнува дека овој ден значи поддршка на поезијата, враќање на усната традиција на поетски рецитали, промоција на едукацијата за поезијата, обновување на дијалогот меѓу поезијата и другите уметности (театарот, танцот, музиката, сликарството), поддршка на малите издавачи и создавање атрактивна слика за поезијата во медиумите така што, вели Бокова, поезијата веќе нема да се смета за застарена форма на уметност.
Светскиот ден на поезијата традициионално се одбележува и во Македонија – со манифестацијата „Поетско пладне“ што ја организираат Мaкедонскиот ПЕН Центар и Националната и универзитетска библиотека „Св. Климент Охридски”.
Поетското слово од Македонија годинава го упати Веле Смилевски, а свои стихови читаа Влада Урошевиќ, Гордана Михаилова-Бишњаковска, Димитар Башевски, Тодор Чаловски, Ферид Мухиќ, Раде Силјан, Санде Стојчевски, Иван Џепароски, Биба Исмаил, Владимир Мартиновски.
Претседателот на ПЕН Ристо Лазаров рече дека годинава манифестацијата е посветена на 85-годишнината од раѓањето на писателите Србо Ивановски, Милан Ѓурчинов и Мето Јовановски.
Одлуката 21 март да се прославува како Светски ден на поезијата беше усвоена во Париз во 1999 година, на 30. сесија на УНЕСКО. Оттогаш денот на поезијата се празнува со книжевни собири низ цел свет и поетите од сите континенти праќаат пораки во чест на стиховното творештво.