Државната изборна комисија ќе ги исполни сите активности за прочистување на Избирачкиот список предвидени со согласноста дадена од четирите политичките партии, изјави денеска претседателот на ДИК, Александар Чичаковски, по средба со претставници на меѓународната заедница, која беше закажана на нивно барање.
Првиот човек на ДИК рече дека тие ги информирале амбасадорите за досегашниот прогрес од нивнта работа, а заинтересираноста за вкрстената проверка на базите на податоци од 10-ти институции била во фокусот, како и тоа колку пријави имало од граѓаните за нерегуларности во Избирачкиот список.
Тој дополни дека на денешната седница, ДИК ќе продолжи да разгледува решенија за тоа како да се постапува по пријавите од граѓаните, бидејќи како што напомена, многу е важно правилно да се адресираат истите пријави.
– Ќе најдеме решение да ги провериме и сите спорни адреси што ни ги испраќаат граѓаните, тие ќе бидат детално проверени и ќе биде постапено по нив. Што се однесува до теренската проверка, ќе бидат проверени спорните податоци од вкрстената проверка, изјави Чичаковски.