Координаторот на Пратеничката група на ВМРО-ДПМНЕ, Илија Димовски денеска на прес-конференција на која целата Пратеничка група на владејачката коалиција застана зад него, најостро ја осуди изјавата на Катица Јанева со која го оспорувала легитимитетот на Собранието, Претседателот на Македонија, Владата и Уставниот суд.
– Изјавата на госпоѓа Катица Јанева е политичка изјава, би рекол и партиска изјава. Катица Јанева вчера не беше ниту правник, ниту јавен обвинител, туку беше портпарол на опозициска политичка партија, изјави Димовски.
Според него, се работи за изјава, опасна за државноста и суверенитетот на Република Македонија.
– Ако се земе за сериозна, оваа изјава значи дека Република Македонија нема институции, нема Собрание, нема Претседател, нема Влада и нема Уставен суд. Односно оваа изјава значи дека Република Македонија формално не постои и не постои нејзиниот правен поредок, вели Димовски, кој дополни дека според неа, Македонија треба да се претвори во Протекторат на странска земја.
Специјална обвинителка Катица Јанева која вчер априсуствуваше на конференција заендо со државниот јавен обвинител Марко Зврлевски и шефицата на Националната дирекција за борба против национална корупција на Романија, Лаура Кудрети-Ковеси, посочи оти изборните нерегуларности создале нелегитимни претставници на институциите Претседател на државата, пратениците, како и Уставниот суд.
– Со самите истраги за овие лица кои се или биле на високи функции во РМ и со доказите со кои располагаме кои во 80 проценти го докажуваат обвинението со кое имаме намера да настапиме сметаме дека самиот избор и на претседателот и на Уставен судија и на пратеници е доведен во прашање. Сите овие се нелегитимни институции и треба да го почитуваат Специјалното јавно обвинителство за да ја утврдиме вистината, одговори Јанева на новинарско прашање со кое се побара коментар на скорешната одлука на Уставниот суд којшто му ги врати ингеренциите на претседателот да помилува осудени за изборен криминал.
Димовски денеска потенцираше дека со оваа изјава, Јанева се делигитимирала и себе бидејќи таа била одобрена од пратениците во Собранието, и затоа побара од неа јавно извинување.
Воедно тој ја повика да се јави и да одговори пред Комисијата за политички систем а потоа и на пленарна седница, и како што вели, да не се става над Уставот на земјава, цитирајчи неколк одредби, кои според него и наложуваат на Јанева да се појави и да одговори на прашањата на пратеничките групи.
Одговарајќи на новинарско прашање дали Јанева е легитимна за ВМРО-ДПМНЕ, Димовски рече дека тие уште на почетокот гласале за нејзината функција и го одбориле Буџетот за Специјалното јавно обвинителство.