Протестот во солидарност со палестинскиот народ организиран од страна на Гласни Идеи се подели откога група од демонстрантите се појавија со религиозни и националистички симболи. Џејлан Велиу, активистка од Гласни Идеи, експлицитно кажа дека Гласни Идеи се одвојува од другата група на демонстранти заради присуството на националистичките симболи кои немаа врска со случувањата во Палестина. Велиу исто така потенцираше дека Гласи Идеи организираат мирен протест.
Според Al Jazeera во последната ескалација на настаните во регионот, најмалку 145 палестинци, од кои 41 дете, беа убиени во Појасот Газа почнувајќи во понеделникот. Околу 950 други се ранети. На окупираниот Западен брег, израелските сили убија најмалку 13 Палестинци.
На протестот зборуваа Џејлан Велиу и Зоран Василески. Но кога до протестот на Гласни идеи се доближи другата група на демонстранти кои извикуваа навидум исламистички фрази. Планирани беа уште спикери, но протестот од Гласни Идеи се повлече заради тоа што не беше јасно дали ситуацијата можеше да ескалира.
„Стоп за окупацијата на Газа, стоп за бомбардирањето и стоп за присилното иселување. Нема место во 21 век за етнички чисти територии. Големите идеи за големи етнички чисти држави, треба да останат во минатото. После Белград, Приштина, Сараево и Љубљана, и тука во Скопје го дигаме гласот во заштита на обесправените народи. Упатуваме порака до меѓународната заедница, после сите злодела кои ги направи во изминатите децении, да најде сили да се одржи Седницата на Советот за безбедност и да се разговара за ситуацијата во Израел. Долго време се случува невидена репресија врз палестинскиот народ. Ние сме свесни за страдањата што ги имаа Евреите во 19 и 20 век, но нема оправдување да го прават она што ним им го правеа. Ние ја продолжуваме славната традиција на изразување солидарност“, рече во своето обраќање пред присутните активистот Зоран Василески од Гласни Идеи.
„Појасот Газа со стотици мртви, главно цивили, жени и деца, и уништувањето на градот не смее да остави никого рамнодушен. Кога луѓето во некој регион на светот се убивани, малтретирани, угнетувани, девалвирани и кога врз нив се врши неправда, тогаш таа рана е во телото на целото човештво,“ кажа Џејлан Велиу во нејзиниот говор.
„Ние стоиме на страната на палестинскиот народ и бунтот за слобода и правда. Протестираме и ги осудуваме сите влади во светот, кои отворено ги поддржаа зборовите на американскиот претседател Бајден, односно таканареченото „ право на Израел на самоодбрана“ додека ги протерува палестинските семејства од нивните домови и земјиште и ги бомбардира нивните домови. Па го поставуваме прашањето: Дали Палестина има право да се брани? Дали мајките на палестинските деца не плачат за нивните најмили кои гинат под ракетите на Израел, САД и Велика Британија, дали нивната тага е прифатлива и поневредна од тагата на другите?“ додаде Велиу.
Според Радио МОФ, протестантите од навидум исламистичката група не сакале да дадат изјава на македонски јазик и подоцна се упатиле накај Музејот на холокаустот во Скопје.
Елена Гаговска