Украинските и руските сили водат „тешки борби“ за контрола на градовите Миколаев на југот на земјата и за Чернихов на северот, јави утрово Генералштабот на украинската армија, додавајќи дека во тек е, исто така, и украинска воена операција околу Мариупол во источниот дел на Доњецк.
Градоначалникот на Мариупол порача дека ситуацијата во градот е „многу тешка“, дека градот е „под хуманитарна блокада“ и под силно гранатирање. Тој истакна дека има голем број на ранети во гранатирањата во последните денови и оти руските сили спречуваат испорака на храна и лекови.
Градот Мариупол повеќе не постои, рече тој.
Евакуацијата на цивили, според градските власти, е одложена бројните руски кршења на прекинот на огнот, додека Москва за тоа ги обвинува „украинските националисти“.
Шефот на војската во Доњецк кој е под контрола на руските сепаратисти, Едуард Басурин рече дека денеска повторно ќе бидат отворени коридори за безбедно минување на цивилното население во два града во тој регион – Мариупол и Волновака.
Притоа не кажа колку долго ќе биде отворен безбедниот премин, ниту дали ќе биде воведено примирје за олеснување на евакуацијата од двата града.
За утре е најавена трета рунда на преговори меѓу Украина и Русија, истакна членот на украинската делегација, Давид Арахамија.
Рускиот претседател Владимир Путин вчера предупреди дека секоја земја што ќе се обиде да наметне зона на забранети летови над Украина од Русија ќе се смета како учесник во војната. Тоа е едно од барањата на официјален Киев, а НАТО веќе го исклучи како можност.