Шефот на руската дипломатија, Сергеј Лавров во интервју за државната телевизија „Русија 24“ рече дека Русија го променила ставот и повеќе ќе нема прекин на огнот поради преговорите.
Тој рече дека нападот на Украина, меѓу другото, има за цел да го прекине патиот кон „целосна доминација на САД и останатите западни земји“.
„Нашата специјална операција е осмислена да застане на патот на безобзирното ширење и непромислениот пат кон целосна доминација на Соединетите Американски Држави и остатокот на западни земји кои се под нив на меѓународната арена“, рече тој.
Лавров потенцира дека „таквата доминација се гради со грубо кршење на меѓународното право“.
„На Косово беше можно да се признае независност без референдум, а на Крим, како резултат на референдум што го следеа стотина објективни претставници на странски земји и јавноста на странски земји, тоа е невозможно. Во Ирак, 10.000 километри од САД, замислија закана по нивната американска безбедност, го бомбардираа и не најдоа никаква закана, а ниту се извинија“, рече Лавров.
„А, кога неонацисти и ултрарадикали се наоѓаат на нашите граници, се создаваат десетици биолошки лаборатории по модел на Пентагон, се спроведуваат некакви експерименти кои првенствено се насочени кон создавање на биолошко оружје за кои се пронајдени и документи кои не оставаат никаков сомнеж за тоа, тогаш ова е закана на нашите граници, а не преку океанот“, додаде рускиот министер за надворешни работи.
Извештаите за сторени воени злосторства на руски трупи во Буча и Краматорск повторни ги нарече монтирани и ги оцени како провокација. Лавров додаде и дека дел од луѓето во расцепканиот Донбас „со години живеат под неонацисти“.