Увид од страна на полицијата и крим техника во моментов се врши во плинарата во Богданци, каде утрово во силна експлозија три лица животот го изгубија, а еден е повреден.
Во моментов се очекува да пристигне судската медицина од Скопје, за да се направи идентификација на телата.
Очевидци на местото на настанот виделе како по самата експлозија еден од жртвите се фрлил во реката запален, а по се изгледа станува збор за повредениот кој е пренесен на клиниките во Скопје. Сите жртви се од селото Ѓавато.
Петнаесет минути после експлозијата на лице место дошла противпожарна екипа од Гевгелија, која што го локализирала пожарот, а увидот кој се врши моментално со закаснување е поради можноста од повторна експлозија.
Очевидци од Богданци кажуваат дека слушнале две силни експлозии експлозија исто како да има земјотрес.
Обвинителката Василка Садикова Ковачева, од Обвинителство – Гевгелија изјави дека земен е хард дискот од компјутерот на објектот, за да се види од снимките како е настаната експлозијата.
Според првичните сознанија, пожарот избувнал изутрината во 8.50 часот од искра во одделот за полнење плински боци, а силната експлозија го вознемирила населението во Богданци.