Денеска се гласа во 22 земји членки на ЕУ. Во седум веќе се гласаше и од таму доаѓаат добри вести за иднината на европската конструкција. Во Холандија победија Социјалистите исто како и во Малта. Во Словачка, Латвија и Чешка либералите, додека во Ирска голем успех бележат Зелените.
Овие првични, неофицијални резултати кои најавуваат победа на проевропски ориентирани полтички партии се спротивни на прогнозите кои очекуваа голем пораст на пратенички места за екстермната десница и евроскептиците. Во прилог на овој пресврт во очекувањата е и јасно зголемената излезност на гласачите која се очекува да биде во корист на проевроспките политички сили.
Во големи земји членки како Франција, Романија и Унгарија излезноста до 13 часот е зголемена за 5 проценти во однос на европските избори кои во овие земји се одржаа пред 5 години во 2014 . Слични зголемување на излезноста има и во помалите земји членки како Естонија. Данска, Хрватска, Латвија и Шведска. Зголемената излезеност според аналитичарите се должи на најавите дека екстремистите и евроскептиците на овие десети по ред избори за европскиот парлемент ќе влезат на голема врата.
Сега фокусот е насочен кон исходот на гласањето во Франција и Италија од каде се очекува и најголемиот контингент на екстермисти. Во Италија е најавена победа на Лигата на актуелниот министер за внатрешни работи Салвини додека во Франција последите истражувања на јавното мислење покажаа дека таму ќе се води мртва трка помеѓу либералите на Макрон и екстермната десница на Ле Пен. Последното истражување покажа мала предност за Ле Пен, но зголемената излезност би можела да биде во корист на Макрон.
Конечните официјални резулатати ќе бидат објавени вечерва околу 22 часот во Европскиот парламент во Брисел од каде што преку илјада дописници од целиот свет ја следат оваа изборна трка. Според најавите, кон полноќ во седиштето на ЕП во Брисел се очекува да пристигнат и двајцата таканаречени шпиц кандидати за наследници на актуелниот шеф на Европската комисија Јункер, Холанѓанецот Тимерманс како кандидат на Европските социјалисти и Германецот Вебер, кој е кандидат на Европската народна партија.
Нивните амбиции да застанат на чело на европската извршна власт во голема мерка зависат од конечниот исход на овие избори. Вебер е фаворит како дел од Европската народна партија која ќе освои најголем број на пратенички места но неговата амбиција е загрозена поради кризата во неговото политичко семејство настаната околу неговата кандидатура. Значен дел во Европската народна партија го фаворизира Французинот Мишел Барние , актуелен преговарач на ЕУ за Брегзит. Тимерманс зад него ги има Европските социјалисти кои ќе го освојат второто место, но како негова предност сега се смета големата и неочекувана победа која ја забележа на изборите во Холандија кои се одржаа во четвртокот.