Советниците на Емануел Макрон велат дека неговиот разговор со Владимир Путин во понеделникот бил искрен и тежок. Францускиот претседател успеал да добие неколку ветувања од рускиот лидер, но Париз се сомнева дека Путин ќе ги исполни.
Телефонскиот разговор во понеделникот попладне меѓу францускиот претседател Емануел Макрон и Владимир Путин траел 90 минути. Може да се замисли колку била тешка дискусијата која траела половина час кога едниот учесник и објави војна на Украина, а другиот се приклучи на европскиот фронт кој воведува строги санкции кон Русија. Затоа, расположението во кабинетот на Макрон во Елисејската палата, во понеделникот вечерта не било премногу оптимистичко.
Советникот на Макрон рекол дека тоа била отворена и силна дискусија – што веројатно значи, кога ќе се преведе од дипломатски на народен јазик, дека разговорот бил прилично конфронтирачки и груб. Како што беше случајот за време на претходната посета на Макрон на Москва, рекол советникот, францускиот претседател се најде соочен со руски лидер кој стана заробеник на неговиот сопствен поглед на светот.
„Постојано се обидувавме да му укажеме на Путин дека има други опции освен војна“, рече блискиот советник на Макрон. „И дека нашите сојузници не охрабруваат да го сториме тоа.
Советникот рече дека францускиот претседател ја покажал својата длабока загриженост и му посочил на Путин сè што е геополитички загрозено. Тој рече дека рускиот претседател му одговорил на Макрон на многу „клинички ладен“ начин.
Сепак, Макрон успеал да извлече неколку ветувања од Путин, но претставниците на Елисеј не се сигурни дека вредат многу, додавајќи дека ситуацијата ќе треба внимателно да се следи во наредните денови. Макрон го повика Путин да престане со нападите врз цивили и станбени области, да избегне оштетување на цивилната инфраструктура и да се воздржи од напади врз главните транспортни артерии на Украина, особено на патот што води од југ до Киев. Според официјалното соопштение од Елисејската палата, рускиот претседател ја потврдил подготвеноста да ги почитува сите три точки.
Двете страни се согласиле да одржат контакт во наредните денови – ветување што го прави Макрон единствениот европски лидер со кој Путин сè уште зборува.
Од самиот почеток на неговото претседателствување, Макрон се обиде да изгради посебен однос со Путин. Само неколку недели по неговиот избор во мај 2017 година, тој го прими рускиот претседател во величествените сали на Версај. Две години подоцна, без претходно да се консултира со другите европски лидери, тој го покани Путин во претседателската куќа за одмор во Форт Брегансон на Азурниот брег. Самитот на Г-7 се одржа неколку дена подоцна во Бијариц – настан од кој Русија беше исклучена откако го анектираше Крим во 2014 година. Во тоа време, многумина го сметаа состанокот во пресрет на самитот како намерна провокација.
Макрон одговори велејќи: „Колку повеќе правиме за повторно да ја приближиме Русија до Европа, толку подобро ќе биде. Јас сум убеден во тоа“. Русија е дел од Европа и не може да биде оставена на влијанието на Кина, им рече тој на критичарите.
Но, Макрон, исто така, забележа во последните недели дека Путин во 2022 година е сосема поинаков од рускиот лидер што го покани во Версај пред едвај пет години. По речиси шестчасовниот разговор со рускиот претседател во Москва на 7 февруари, Макрон на новинарите кои патуваа со него во авионот им речкол дека бил сведок на променет човек во Кремљ. Тој рече дека Путин станал понепопустлив и поригиден и дека изгледал изолиран.