Договорот во Турција помеѓу Москва и Киев, за деблокирање на Црното Море и обновување на извозот на украинското жито, е „критичен чекор напред“ за Европската Унија (ЕУ), јави дописничката на МИА од Брисел. Договорот доаѓа по месеци на тензии и загрозување на прехранбената безбедност на глобално ниво.
Дипломатската служба на ЕУ инсистира дека состојбата е предизвикана исклучиво поради руската инвазија и потенцира дека успехот на договорот Истанбул ќе зависи од ефикасна имплементација во дух на доверба на истиот.
Европската Унија оценува дека прехранбената криза, што настана со блокада на Црно Море и уништувањето на украинските земјоделски резерви, транспортна инфраструктура и опрема е резултат на руските намерни напади, поради што целиот синџир на снабдување на храна во светот е под закана.
Русија, наведува ЕУ, стави милиони луѓе ширум светот во опасност, предизвикувајќи прехранбена нестабилност. Договорот е надеж дека овој тренд ќе се измени.
Европската Унија ја поздрави улогата на медијатор на Турција во овој спор како важна поддршка за применување на договорот.
Брисел ќе продолжи да ѝ помага на Украина да го извезува своето жито на глобалниот пазар најбрзо што може. Само во јуни, преку ЕУ, е обезбеден извоз на 2,5 милиони тони од Украина, а Унијата до 2024 година ќе мобилизира 7,7 милијарди евра за оваа цел, во соработка со Обединетите Нации и групата Г7.
Последниот пакет на санкции на ЕУ против Русија, исто така, предвидува изземање на земјоделските производи.