Европол денеска предупреди на ризик за украинските бегалци од мрежата за трговија со луѓе и ги повика земјите на Европската Унија (ЕУ) кои ги примаат да бидат внимателни.
„Бројот на потенцијални жртви кои доаѓаат од Украина би можел да привлече изолирани агресори и опортунисти кои се претставуваат како добронамерни, како и криминални мрежи кои се специјализирани за трговија со луѓе“, се вели во соопштението на европската полициска агенција.
Како најзагрижувачки се потенцираат пограничните пограчја, центрите за прифаќање и сместување на бегалци и сообраќајни јазли како железнички и автомобилиски рути. Источна Европа е клучен извор на жртви на трговија со луѓе што се искористува во цела ЕУ. Тоа е, исто така, и регион од кој потекнуваат членови на многу криминални мрежи, потсетува Европол.
Најголем број на луѓе кои бегаат од Украина се жени, деца и ранливи категории на лица кои лесно може да станат жртви на сексуално искористување и присилна работа, но и да бидат принудени на криминал и питачење. Од почетокот на руската инвазија, од Украина побегнаа, речиси, 3,5 милиони лица според денеска објавените податоци на Обединетите Нации.