Министерот за здравство Венко Филипче вели дека деновиве се чувствува мало олеснување во здравствениот систем односно забележан е благ пад на бројот на новозаболени лица. Вели доколку ваквиот тренд продолжи тоа ќе значи дека пикот на третиот најсилен бран до сега е веќе зад нас.
„Вчера во текот на денот осетивме мало спласнување. Денес и бројката е нешто помала, околу 1.200 треба да биде. Да не избрзуваме, мора да ја следиме состојбата и оваа недела, веројатно пикот е зад нас, но тоа ќе го кажеме некаде на почетокот на следната недела“, рече министерот Филипче.
Во однос на имунизацијата на населението во земјава соопшти дека до сега вакцинирани се околу 15 илјади лица, а само денеска до пладне вакцина примиле 1.000 граѓани.
„Несакани ефекти не се пријавени во МАЛМЕД. Локална реакција со мало црвенило и болка на местото на апликацијата не би требало ниту да се пријави оти нема клиничко значење“, рече министерот Филипче.
Тој уверува дека пристап до вакцината ќе имаат сите категории граѓани, вклучително и оние кои немаат матичен лекар. Иако секој има пристап до матичен лекар, и оние кои немаат одбрано, за вакцинација може да се обратат во Минитерството за здравство од каде велат дека ќе им биде обезбеден термин.