Околу 250 барања за проценки на штетите се поднесени од најпогодените места, Просениково, Сачево, Муртино и Дабиле во струмичкиот регион. Жителите чистејќи ги своите поплавени домови, со солзи во очите ни ја опишуваа катастрофалната состојба. Велат повторно го доживуваме хоророт од пред две години кога бевме поплавени.
„Се јавивме неколку пати во Кризниот штаб по информациите дека доаѓа силен бран кон реката Струмешница, да прашаме дали да реагираме навреме, да спасиме што можеме. Ни рекоа да не се грижиме, оти нашиот регион ќе биде заобиколен, вели за НОВА Горан Тодоров од струмичкото село Дабиле.
Тодоров рече дека од утре комисиите на лице место ќе утврдувале колкава ќе биде проценката од штетите.
„ Првиот кат од куќата и цела покуќнина е извадена и ќе биде фрлена, целиот алат од работилницата ми е оштетен. Нема каде да се седи доле, половина метар ѕидовите во куќата се оштетени“, вели Тодоров.
Да беа исчистени каналите и речните корита немаше да дојде до таква штета. Истото ни се случи пред две години и повторно ништо не се исчисти, велат жителите на село Дабиле. И во соседната куќа, кај фамилијата Сачевски, истата катастрофална слика.
„Синот, ќерката и зетот, од два часот по полноќ до осум часот следното утро со кофи на свеќи вадеа вода од куќата, велат Сачевски.
Канцелариите на месните заедници во населените места Муртино и Сачево и денеска беа отворени, а вработените во администрацијата на општина Струмица ги примаа барањата на граѓаните за проценка на штетите од поплавите.
Граѓаните кои не можат да поднесат барања во канцелариите на месните заедници тоа ќе можат да го направат од понеделник во општина Струмица, а со себе треба да понесат лична карта, број на трансакциска сметка и копија од имотен лист.