Директорката на основното училиште во селото Колешино во околината на Струмица решила да не ја одржи втората смена часови и наместо тоа, ги повикала сите професори и ученици наставата да ја одржат утрината затоа што морале да одат на митинг на владејачката партија во Охрид, тврдат извори на НОВА во ОУ Видое Подгорец.
-Ја прашавме зошто, и ни рече „Ех, па знаете зошто“. Ние кои не сме од таа партија не ни кажува директно, ама колегите кажуваат дека мора да одат на митинг, вели вработен во училиштето кој замоли да остане анонимен.
Според програмата за оваа недела, одделенската настава до петто одделение се одржувала во втора смена. Но, вчера стигнал абер од директорката дека мора да се дојде прва смена, иако не биле писмео известени зошто се менува програмата. НОВА ја праша директорката на што се темели оваа одлука.
-Настава имаше до 13 часот. Зошто прашувате?, рече директорката Душанка Василева и ја спушти слушалката.
Првиот митинг на владејачката партија е закажан за вечерва во Охрид со почеток од осум часот.