Соопштението на Регулаторната комисија за енергетика (РКЕ) за новите, максимални, цени на горивата што ќе стапат од полноќ, беше сигнал за граѓаните за, буквално, да ги „окупираат“ бензинските пумпи попладнево. Метежот што е регистриран во главниот град е слика и во останатите делови на земјата.
Бензинот Еуросупер БС-95 од ноќеска на полноќ ќе се продава по цена од 104 денари за литар, малопродажната цена на Еуросупер БС-98 ќе изнесува 106,5 денари за литар, додека дизелот ќе се точи за 95 денари за литар, објави попладнево Регулаторната комисија за енергетика (РКЕ).
Малопродажната цена на бензинот Еуросупер БС-95 се зголемува за 9 денари за литар, безоловниот бензин Еуросупер БС-98 се зголемува за 9,5 денари за литар, дизелот ќе „скокне“ за 9 денари за литар, а малопродажната цена на Екстра лесното масло за домаќинство (ЕЛ-1) се зголемува за 8,50 денари за литар. Иста останува само цената на Мазутот М-1 НС – 54,640 денари.