Македонија живее време на политички мотивирани судења против политички неистомисленици на власта, полошо од периодот на 1949 година. Исто како и тогаш: во име на народот. Една модерна инквизиција во која жртвата пред судењето да почне е веќе осудена и неформално е договорена и висината на казната меѓу спрегата власт-обвинителство -судство, пишува во екс премиерот Никола Груевски во пост на Фејсбук.
Неговото ново јавување на социјалната мрежа е реакција на денешната пресуда за предметот „Плацови на Водно“ за кој доби казна затвор во траење од седум години, а Судот донесе одлука и за конфискација на имот на негово име.
„Пресудите и висината на казните се одредени уште пред да почне судењето. Се другото е „театар” за јавност, односно време на пропаганда кога и јавноста треба да се убеди, што завршува со долг политички говор и некаква психолошка анализа на судијата, бидејќи за правна нема реални аргументи. Аудио снимки се прифаќаат како доказ кога им одговара на обвинителството и судот, односно на власта за да осудат некој што им е таргет, но ако истите треба да докажат дека таргетираното лице нема вина, тогаш истите не се дозволува да се изведат како докази“, наведува, меѓу другото, Груевски.
Ако си политички ставен на острел, додава тој, „може да те обвинат и што не си пријавил имот кој не е и никогаш не бил твој и истиот уште и да го запленат заради политичко пропагандни цели, а вистинските негови сопственици да си молчат и уште да се среќни што извлекле жива глава”.
„Во Македонија во ова време во политички мотивираните процеси не суди судот, туку политиката. Потоа подготвени чекаат сервилните и контролирани медиуми, т.н. аналитичари и т.н. експерти да ја дораспарчат жртвата која нема никаква реална вина и да отслугуваат на политиката. Власта преку правосудниот систем прави што сака, кому сака нешто запленува и во колкава сака вредност независно од се, кому сака не запленува, зависно од близината со неа“, нагласува поранешниот премиер.
Постот на Фејсбук го завршува со став дека „нема критична маса меѓу стручната елита која е спремна да постави логични прашања колку и да гледа беззаконие и апсурдни процеси. Но, ништо не е вечно… IL BUON TEMPO VERRA (Ќе дојде добро време)“.