Новороденчиња на гинекологија умираат поради предвременото породување предизвикано од ризична бременост, а не поради недоволниот број на инкубатори, тврди за НОВА Марија Хаџи Лега поранешна директорка на Клиниката за гинекологија. Таа обвинува дека екс министерот Тодоров не сакал да го прифати проектот за водење на здрава бременост со кој може да се намали смртноста, на кој тим од гинеколози работеле цела година. Хаџи Лега смета дека стратегијата за превенција има недостатоци, но не наишле на слух кај тогашниот министер за здравство за да се направат измени.
„Две години сме во политичка криза и сите проекти се застанати. Ние една година работевме на проблемот со предвремените породувања во рамки на перинаталниот комитет, но Тодоров не го прифати проектот. Затоа политиката не треба да се меша во стручноста “, изјави за НОВА Хаџи Лега, која во моментот е на боледување.
Поранешната директорка која беше позната по нејзината блискост со екс министерот Тодоров, сега се дистанцира од политиката и партијата која ја назначи да раководи со клиниката. Токму во нејзиното раководење се случи најголемиот пораст на смртност на новороденчиња. Минатата година на клиниката починаа 184 новороденчиња, два пати повеќе од претходната 2015 година. Годинава очигледно ќе биде со уште поголем пораст бидејќи само во првите седум месеци регистрирани се 127 смртни случаи кај новороденчиња.
Хаџи Лега тврди дека главно смртните случаи се кај новороденчиња под 26 гестациска недела и смета дека смртноста на новороденчињата може да се намали само ако добро се организира перинаталната грижа. Тоа значи добра организација и превенција за трудниците. Бројот на инкубатори не е важен бидејќи им е потребен само на 1 процент од новородените деца, а што е со останатите 99 проценти од бебињата, вели Хаџи Лега. Таа смета дека на клиниката додека беше директорка купени се респиратори и инкубатори , како и друга медицинска опрема.
Пред две недели Државниот санитарен инспекторат потврди дека катастрофално лошите услови на Клиниката за гинекологија допринеле за зголемената смртност на новороденчиња. Инспекторите утврдиле дека во еден инкубатор биле сместувани по две новороденчиња бидејќи клиниката има недостиг од инкубатори, но и од простор за интензивна нега.