Постои целосно нова динамика во дијалогот со Софија од кој се очекуваат резултати, но важно е процесот на реформи во Северна Македонија енергично да продолжи напред, датумот на отпочнување на преговорите сам по себе не е важен, оценува амбасадорката на Германија во земјава, Анке Холштајн.
-Немам кристална топка и не би требало да предвидувам што било, бидејќи тоа не зависи од нас туку од други фактори. Она што сега го имаме е голема посветеност од новата бугарска Влада, имаме целосно нова динамика, се водат разговори од министрите за надворешни работи за конкретни чекори кон документот. Но ако сето тоа доведе до конкретни резултати многу брзо, не би знаела. Она што јас постојано го повторувам е дека фамозниот датум не е она што е особено важно, туку важно е процесот на реформи во државата енергично да продолжи напред, бидејќи колку што повеќе напредува реформскиот процес многу побрзо би се одвивале самите преговори така што земјата не би губела воопшто време. Oд суштинско значење е енергично да се унапредува реформскиот процес, вели амбасадорката Холштајн на новинарско прашање дали е можно земјава да ги започне преговорите со ЕУ за време на француското претседателство.
Амбасадорката Холштајн изјавата ја даде пред обраќањето на промоција на два истражувачки труда „Анализа на јавното мислење за македонскиот процес на пристапување кон Европската Унија (2014 – 2021)“ и „Од пофалби до разочарувања: 2021 Анализа на јавното мислење за македонскиот процес на пристапување кон Европската Унија“ организирани од Фондација „Конрад Аденауер“ и Институт за демократија.