Хрватската влада ги претстави насоките за штедење на енергија за исполнување на планот на Европската Унија (ЕУ) за заштеда на гас за 15 отсто во периодот од 1 август во 2022 година до 31 март во 2023 година. Поради европската осуда на руската агресија на Украина, Русија испорачува сè помалку гас.
Краткорочните насоки за штедење на енергија се – греењето на становите да биде до 21 степен, ладењето во жешките периоди да биде до максимум 25 степени, да се употребуваат штедливи светилки, да се исклучуваат уредите што не се користат во моментот, да се вози велосипед и да се користи јавен превоз.
„Испратена е порака на европско заедништво и порака дека руското користење на гасот како оружје ќе нема ефект и во тој контекст предлагаме насоки за Хрватска да помогне кон заштедата“, изјави хрватскиот министер за економија и енергетика, Давор Филиповиќ.
Што се однесува до долгорочните мерки за енергетска ефикасност, Филиповиќ советува енергетска обнова на куќите и зградите за што верува дека ќе биде од корист.