Аријан Ибраим од Демократската петија на Турците во Македонија (ДПТМ) е старо-нов градоначалник на Центар Жупа, додека Медат Куртовски од СДСМ доби мандат да раководи со Маврово/Ростуше. Ова е епилогот по вчерашните повторени избори за градоначалници во двете општини.
Ибраим беше единствен кандидат за градоначалник на Општина Центар Жупа и според резултатите од Државната изборна комисија (ДИК), за него гласале 3.340 гласачи од вкупно 3.395 кои го оствариле правото на глас. На функцијата ќе биде по трет пат, откако победи и на локалните избори во 2013 година и во 2017 година.
Кандидатот на СДСМ, пак, Куртовски освои 3.226 гласа во трката за градоначалник на Општина Маврово/Ростуше или 1.291 повеќе од Мевмед Џафери од ВМРО-ДПМНЕ – 1.935 гласови, при излезност на гласачкото тело од 54.24 отсто.
Вонредни избори вчера се спроведоа во Тетово каде се гласаше за советници, по владината одлука во мај за разрешување на тетовскиот Совет. Во новиот Совет на Општина Тетово, според првичните резултати на ДИК, влегуваат шест партии. Редоследно, по бројот на советнички мандати, тоа се БЕСА – 12, ДУИ – 11, ВМРО-ДПМНЕ 4, СДСМ – 2, Алтернатива – 1 и ДПА – 1.
Излезноста на изборите за советници во Тетово беше 33.4 отсто, а, во однос на гласовите, Беса освои 9.620, ДУИ – 8.702, – ВМРО-ДПМНЕ – 3.332, СДСМ – 1.953, Алтернатива – 1.118 и ДПА – 1.058.