Американските истражувачи се сомневаат дека исчезнатиот малезиски авион останал во воздухот околу четири часа од последно-потврдената локација, со што се отвора можноста да поминал дополнителни стотици километри од предвиденото, пренесува „Вол Стрит Џурнал“.
Базирајќи се на автоматското префрлање на податоците од Боингот, истражувачите од американската авијација, и претставниците од националната безбедност веруваат дека авионот летал точно пет часа, со што се отвораат нови прашања и можности за она што би можело да се случи со исчезнатиот авион кој леташе од Куала Лумпур до Пекинг.
Засега меѓународната истрага не дава резултати и по шест дена по мистериозното исчезнување.
Американските претставници за контра-тероризам ја разгледуваат и можноста пилотот или некој друг од авионот, да го пренасочил кон непозната локација по намерно исклучување на уредите за радарско детектирање. Тие не ја исклучуваат можноста за тероризам но укажуваат дека засега ништо не индицира на тоа.
Но несигурноста за тоа кон каде авионот се упатувал и зошто очигледно продолжил да лета без транспондери, покренува теории помеѓу истражувачите дека авионот можеби бил управуван за причини непознати за американските власти.
Останува нејасно дали авионот пристигнал на одредена дестинација или се распаднал стотици километри подалеку од актуелниот фокус на истрагата.
Во едно такво сценарио, ниту механички проблеми, ниту грешка на пилотот или некој друг инцидент, не би биле причина за исчезнување на авионот од радарите.
Мониторингот врз моторите на авионот го прави „Ролс Ројс“, кој периодично праќа податоци за состојбата со моторите, акциите и движењата.
„Исчезнувањето е сега официјално инцидент и сите информации се контролираат од истражувачите“, вели службеник на Ролс Ројс.
Според договорот за одржување, „Малезија Ерлајнс“ пренесува податоци за моторите до Ролс Ројс, кои потоа тие ги анализираат. Во системот се опфатени внатрешната статистика на моторите, на два други помошни мотори, слики од перформансите како и висината и брзината на авионот.
Според познавачите на системот, тие отсечоци се составуваат и се испраќаат во променливи од 30 минути, а податоците се процесираат автоматски.
Статистиката од моторот се анализира за да се одреди патот на летот откако ќе престанат да работат транспондерите.
.jpg)
Исчезнатиот авион летал кон Кина а неговата последна локација која е позната, е на половина пат до Заливот на Тајланд. Доколку се земе во предвид летот од пет часа по полетувањето од Куала Лумпур, тогаш Боингот 777 би можел да биде близу границите на Пакистан или Арапското море.
Како последица на барањата на Кина и Виетнам кои сметаа дека истрага се одвива забавено, малезиските власти веќе ја зголемија зоната која се истражува.
Во истрагата, 10 земји ги покриваат водените површини околу Малезија, меѓи кои Кина, САД и Виетнам, додека Тајван ќе се приклучи до петок, а Индија и Јапонија исто така најавија учество во потрагата.
Вкупно 56 бродови учествуваат, 27 од нив на Малезија, а уште 30 авиони и 10 хеликоптери се вклучени во потрагата во водите помеѓу Малезија и Виетнам.
Според американските претставници, предизвикот не е координацијата помеѓу земјите, туку обемот, и иако и тие учествуваат во истрагата, засега немаат резултати. Многу од експертите сметаат дека не се бара на вистинското место.
Малезиските власти пак, потенцираа дека ја прошириле истргата и се разгледуваат можности инцидентот да е поттикнат од лични или психолошки проблеми на членовите на екипажот или патниците, но засега не се огласија за неработењето на резервните транспондери.