Добра вечер за родниот крај на еден голем Македонец, Борис Трајковски, претседателот на Македонија. Вториот претседател на Република Македонија. Кој го почитуваме и му се восхитуваме, го започна својот говор на митингот вчера во Струмица, претседателскиот кандидат Горге Иванов.
– Нашиот јужен сосед за жал, не блокира. Од таа блокада излезе нашата потреба да ја градиме Европа во Македонија. Но не се откажуваме. Затоа и добивме 5 извештаи, 5 препораки за почеток на преговорите. Тие не блокираат затоа што сакаат да се откажеме од сопствениот идентитет. Но не потклекнавме. И нема да потклекнеме. Не знам за моите противкандидати, но јас имам јасен став. Нема да прифатам промена на Уставот, со цел промена на уставното име.
– Нема да прифатам идеи, или предлози што би го загрозиле македонскиот национален идентитет, посебноста на македонската нација, македонскиот јазик и македонскиот модел на соживот. Нема да дозволиме Република Македонија и македонските граѓани да бидат обезличени. Македонските граѓани сами одлучуваат за своите клучни национални прашања. Никој, освен македонските граѓани нема право да одлучува за името на нашата татковина Македонија. Никој освен македонските граѓани нема право да одлучува за иднината на Македонија. За секое решение ќе се изјаснат македонските граѓани на референдум, истакна Иванов.
Тој потенцираше дека денес политиката не се мери по убави зборови, по убави говори, празни ветувања, туку политиката се мери по бројот на отворени работни места.
– По тоа не почитуваа граѓаните. Учествував во многу проекти. Давав политичка поддршка за многу проекти на Владата. Затоа што е тоа во интерес на сите нас. Затоа што тоа е од интерес на граѓаните. Ќе продолжам истото да го правам. Каде што одев со моите делегации, доаѓаа бизнисмени и претприемачи. Им помагав на многу бизнисмени да стапат во контакт со странски амбасадори.
– И тука во Струмица и струмичко носев амбасадори за да ги запознаат со потенцијалите на нашиот крај. Ќе продолжам тоа да го правам. Имаме успеси и во земјоделието. Затоа што секој од нас знае колку е тешко да се успее во животот обработувајќи земја. 500 милиони евра до сега се издвоени за земјоделието. Ги промовиравме потенцијалите на Македонија. Промовиравме производи од Македонија. Тие производи секаде се препознатливи, им порача Иванов на струмичани.
– Но тоа произлегува до нашата посветеност, да веруваме, и затоа ја почитувам религиозната толеранција која постои во Струмица и струмичко. Затоа наоѓав време да одам кај православните христијани, кај Католиците, кај Евангелистите. Тука во Струмица бев, одев и во џамии, одев и на ифтари, одев и на Ханука кај Евреите. Тоа беше моето мото, еден за сите. Затоа бев присутен кај сите, да ги охрабрувам, да се верува, затоа што има многу религии, но има една вера – вера во бога. И затоа Струмичани успеваат. Секој што верува успева.
– И ние веруваме во успехот на Македонија. Веруваме дека Македонија ќе биде во Европа. Веруваме дека создаваме држава и економија која што создаваат работни места. Веруваме дека Македонија е дом во кој се гради благосостојбата на сите. Знаеме тоа како да го постигнеме. Знаеме тоа како се постигнува. И затоа ја добиваме Вашата доверба. И затоа даваме отчет. И затоа имаме чист образ и исправена глава пред Вас, рече Иванов.
Центарот за Комуникации на ВМРО-ДПМНЕ испрати текст од говорот и фотографии