Во Македонската академија на науките и уметностите, вечерва во 19 часот, ќе се отвори изложбата на Глигор Чемерски, насловена „Води и пловидби – Земни плодови“
„Може да се рече дека Глигор Чемерски зазема некои склучни ставови, до кои доаѓа низ своето сопствено искуство и низ своите афинитети, уште во раната младост. Во времето кога тој се појавува на ликовната сцена, во почетокот на шеесетите години на минатиот век, и кај нас и во светот се чувствува голем наплив на апстракцијата. Наспроти оваа, тогаш доминантна струја, Чемерски, како сосема млад сликар, ја истакнува својата ликовна поетика како повик за обнова на фигуративното сликарство. Оттогаш палетата на овој сликар, неговата ликовна постапка и неговиот израз се менувале, но во основа, тој и останал верен на таа своја генерална уметничка определба сè до денес.“ пишува Влада Урошевиќ во пресрет на изложбата.
Делата на Чемерски се застапени во колекциите на Ватиканскиот Музеј, Светската банка во Вашингтон, во Музејот на современа уметност во Скопје, во МСУ – Белград, Современата галерија во Будва, и во слични институции во Софија, Северна Каролина и САД. Од 2012 година е редовен член на МАНУ.