Сомнителни апели за помош на болни деца кружат на социјалните мрежи. Граѓаните се повикуваат да донираат пари за тешко болни деца и да ги уплаќаат директно на сметка во банка. Некаде се бараат огромни суми на пари, како за пресадување на црн дроб на пример, интервенција која чини 130 000 евра. Во сите апели за помош се појавуваат имиња и фотографии од различни деца, а секој повик завршува со сметка во банка на иста личност.
Човекот по име Ставре Грнев од Кавадарци во апелите за помош се појавува како татко на различни деца и бара граѓаните да уплаќаат средства за спас на животот на децата. Апелите за помош на социјалните мрежи се споделуваат од различни профили, што наведува на можноста дека станува збор за организирана група.
НОВА започна да го истражува случајот, откако некои луѓе забележале дека станува збор за измама, а една млада жена, Билјана Иљиевски од Прилеп ги анализирала и документирала повеќето апели.
„Доста време потрошив на ова. Знаете,нема подобар детектив од загрижена мајка“, рече Билјана Иљиевски.
Откога видовме за што се работи, НОВА пред да ја објави информацијата случајот го пријави во полиција. Истото го стори и нашата соговорничка.
„Случајот е предаден кај надлежен инспектор кој понатаму ќе постапува по пријавите“, велат во СВР Велес.
Иако,македонската полиција бара пријавата да биде доставена од измамени граѓани, неофицијално дознаваме дека е побарана дозвола од обвинителство да се проверат сметките во банка на Грнев.
Очигледно, измамникот кој оперира не само во Македонија, туку и на поранешните ЈУ простори тоа го прави на најлесен можен начин играјќи на карта на емоции на граѓаните.
Нашите сознанија говорат дека пари се изнудувале и од наши иселеници во САД и Канада. Некои од нив контактирале и телефонски со Грнев, дури и му понудиле да купат апарат кој го олеснува дишењето на детето за што всушност собирал пари, но тој преку други со кои веројатно делува, одбил барајќи исклучиво пари на сметка. Во повиците за помош на болни деца има и сметка од странска банка, а во образложението пишува дека парите се префрлаат преку Вестерн Унион.
И додека македонската полиција го истражува случајот, граѓаните ги полнат сметките во банка мислејќи дека донираат за болни деца. Не се знае ќе има ли одговорност за ова лице и постои ли можност на измамените граѓани да им бидат вратени парите.