Голема израелска болница денеска почна да им дава четврта доза од вакцината против ковид-19 на 150 медицински работници, како дел од студијата чија цел е да се процени дали е неопходно да се даде втор засилувач низ целата земја.
Медицинскиот центар Шеба во близина на Тел Авив објави дека нивното испитување ќе „фрли светлина“ на ефективноста на четвртата доза и ќе им помогне на носителите на одлуки да ја одредат здравствената политика во Израел и во странство, пренесува Ројтерс.
Експертска комисија од израелското Министерство за здравство препорача да им се понуди четврта доза од вакцината „Фајзер/Бионтек“ на Израелците постари од 60 години што првата засилувачка доза ја примиле пред најмалку четири месеци.
Конечното одобрување на генералниот директор на министерството сè уште се чека, во екот на јавната расправа за тоа дали има доволно научни информации за да се оправда нова засилувачка доза.
