Граѓаните и стручните служби се подготвени за новиот бран на врнежи, најавен од страна на синоптичарите кој се очекува да надојде вечерва. Од општина Струмица велат дека од денеска општинскиот штаб за заштита и спасување целосно ќе ги презема активностите кои се случуваат во регионот, бидејќи досегашните активности од страна на Дирекцијата за заштита и спасување и Центарот за кризи не се доволни за да помогнат при евентуалните поплави.
„Вклучена е целата механизација што е на располагање на територијата на општина Струмица, а упатена е и дополнителна поради недоволното ангажирање од страна на Дирекцијата за заштита и спасување, вели Кирил Парталов, командант на општинскиот штаб.
Од општината изјавија дека активностите кои се случија претходните денови кога беа поплавени неколку населени места биле превентивни и не можат да овозможат целосна сигурност на граѓаните на Струмица.
„Дополнително се испратени вреќи и песок , а ангажирани се и дежурни лица кои ќе бидат во комуникација со општинскиот штаб за заштита и спасување при општина Струмица“, истакна Парталов.
Во населените места во струмичко кои најмногу беа погодени од поплавите во изминатите денови, велат дека денеска се работи на терен со механизација и дека населението е подготвено за евентуални нови поплави.
Празнење на одредена количина на вода од 3 милиони метри кубни е извршено и во радовишкиот регион, со што е ослободен простор за излевање на водата во браната Мантово.
„ Исто така на потегот кај Конче има две мали езера со капацитет од околу 240 000 метри кубни, па и таму е извршено празнење за изливање во реката Конечка“, вели Драган Чачаров, од Водостопанство Радовишко поле.
Извршени се и одредени зафати од страна на општината кај две-три радовишки реки кои се клучен фактор за сливање во реката Струмешница, што прави најмногу проблем во струмичкиот регион, велат од Радовишко поле.
Од таму додаваат дека е потребно да се работи во континуитет, а не само во моменти кога се соочуваме со проблеми.
И во гевгелискиот регион се подготвени за најавите за новите дождови во наредните денови.
„Во Гевгелија се ангажирани седум градежни фирми на повеќе критични места, а информирано е и месното население, вели Тихомир Теникиџиев, од Водостопанство Јужен Вардар.
Од таму додаваат дека браната во Богданци е стабилна иако одамна е истата прелеана со 14м3, но како што велат нема место за паника бидејќи максимумот може да биде 160м3.
Во Валандово најголеми проблеми имало на мостот во Мрвинци, но и таму надлежните уверуваат дека состојбата е стабилна.
Од Јужен Вардар посочуваат дека ако пак надојдат големи дождови, водата ќе се излее повторно на критичните места каде што не може да се влезе со градежна механизација.
Според синоптичарите се очекува да наврне од 40 до 60 литри дожд на метар квадратен.