По три часа распит кај судија по претходна постапка во Кривичниот суд во Скопје, министерката за култура Елизабета Канческа Милевска, како осомничена во случајот Тендери на СЈО, пред новинарите изјави дека ова е „политички театар организиран од СДСМ со поддршка од СЈО“.
Таа рече дека се што имала да каже за овој случај, го кажала на прес конференцијата одржана веднаш откако СЈО обелодени истрага за набавки во Министерството за култура, во врска со Музејот на ВМРО.
– Сакам да истакнам дека ова е чисто политички театар организиран од СДСМ, така што СЈО се вклучува во ова политичко дејствување со цел да даде силна поддршка на СДСМ во овој период се до изборите. Се што имав кажав на прес-конференцијата, изјави Канческа-Милевска.
Специјалното јавно обвинителство поднесе предлог до Основниот суд Скопје 1 за определување на мерка претпазливост – одземање патни исправи за две осомничени лица во врска со истрагата за предметот „Тендери“, соопшти СЈО.
За истите две лица е побарана и мерка претпазливост – еднаш неделно, секој вторник во 10 часот да се јавуваат кај определено службено лице во Судот.