Ќе се зголеми надоместокот за ноќни дежурства на лекарите и медицинските сестри на скопските клиники и во сите болници. Министерот за здравство Венко Филипче најави дека од наредната година дежурство кое сега се плаќа од 900 до 1.340 денари во работен ден, од март или април ќе биде платено 2.500 до 3.000 денари. Викенд дежурството кое сега изнесува 2 800 или 2 900 денари ќе се зголеми на 4.000 денари. Ова зголемување доаѓа по реакциите и барањата на лекарите да се зголемат дежурствата барем приближно како на хирурзите кои земаат од 8000 до 12 000 денари за викенд дежурства.
Филипче најави дека се обезбеди и средства за зголемување на платите за пет отсто на сите здравствени работници во втората половина на 2018 година, а обезбедени биле и средства за вработување приватни специјализанти.
„Се обезбедија средства за вработување на 348 приватни специјализанти, кои ќе земаат плата во висина на минималната плата гарантирана за општ лекар“, изјави министерот Филипче.
Тој најави дека н докторите ќе им понудат подобри опции за едукација преку соработка со познати универзитетски центри во Европа.
„Во преговори сме со директорот на Фондот за иновации за етаблирање на нов Центар за истражување во рамки на Клиничкиот центар, каде може да се направат научно – истражувачки проекти кои се клучни во едукација на младите лекари“, истакна Филипче. Министерот нагласи дека за да се растоварат лекарите ќе се воведат административни помошници, кои ќе ги внесуваат податоците на лекарите, затие да можат дас е фокусираат на прегледот на пациентите.
„Целта ќе ни биде да ја зголемиме експертизата на домашните лекари. Ќе инсистираме да се едуцираат во тие дејности, да почнат да ги нудат тие сервиси за кои плаќаме големи средства за лекување во странство. Сите болници ќе имаат обврска да ги тренираат нашите државни лекари за тие да стекнат експертиза“, рече Филипче.