Двајцата главни кандидати од Демократите во САД за претседателска номинација, Хилари Клинтон и Берни Сандерс влегоа во жесток спор за време на дебатата на неколку теми, меѓу кои и контролата врз оружјето, улогата на Русија во Сирија како и самата војна во таа земја.
На дебатата учествуваа и поранешниот американски сенатор Џим Веб, Линколн Чафи, поранешниот гувернер на Роуд Ајланд и поранешниот гувернер на државата Мериленд, Мартин О’Мајли.
Вербалниот дуел помина во знак на Клинтон и Сандерс.
Сопругата на екс-претседателот Бил Клинотн, вети дека ќе се бори за намалување на сите нееднаквости. Сандерс, пак, рече дека ќе се бори за укинување на институционалниот расизам од врвот до дното во земјата.
Клинтон и Сандерс влегоа во дуел за надворешната политика на САД. Клинтон го повтори повикот за поцврсти американски дејствија за запирање на граѓанската војна.
Сандерс, пак, рече дека нема да ја поддржи идејата за испраќање одново на американски воени единици на Блискиот Исток, за да се борат со терористи. Тој категорично се изјасни против испраќање американски единици на терен во Сирија.
Според Сандерс учеството на САД во Ирак со цел соборување на режимот на Садам Хусеин е најголемата надворешно-политичка грешка во историјата на САД.
Во врска со Русија, Клинтон рече дека САД треба да одговорат на дејствијата на Москва и додаде дека Русија се држи агресивно на меѓународната арена.