Комисијата за заразни болести ќе препорача укинување на ковид сертификатите за влез во моловите.
Ова го потврди претседателот на Комисијата, др Александар Петличковски кој рече дека укинувањето на ковид сертификатите за влез во моловите е чекор во насока на олеснување на рестриктивните мерки.
„Ова е еден чекор во насока на олеснување на рестриктивните мерки, но ќе бидеме многу внималелни во следниот период бидејќи не сакаме да постигнеме негативен ефект. Размислуваме и разговараме како полесно да стигнеме до целосно олеснување на рестриктивните мерки“, рече Петличковски.
Мерката нема да важи за влез во угостителските објекти, велат од Комисијата, додавајќи дека мерките ќе се укинуваат постепено со цел да не се влоши епидемиолошката состојба. Ковид сертификати ќе бидат потребни и за влез во одделите за храна кои се наоѓаат во моловите, бидејќи таму, според епидемиолозите сепак се вадат маските.
НоваТВ од извори во Комисијата за заразни болести дознава дека на денешниот состанок се водела бурна дебата околу оваа тема. Членовите на Комисијата, која од неодамна работи во проширен состав, ги судриле аргументите „за“ и „против“ ваквата одлука. Сега, Комисијата препораката ќе ја достави до Министерството за здравство, Кризниот штаб и Владата.
Во Комисијата денеска не се разговарало за укинување на маските во училиштата.
Во меѓувреме, граѓански здруженија и група граѓани преку социјалните мрежи се организираат во сабота да излезат на мирен протест против мерката за задолжителен сертификат за влез во моловите и угостителските објекти, бидејќи сметаат дека со појавата на сојот омикрон, кој полесно и побрзо се шири, мерката е неиздржана и не дава ефект.
Минатата недела, на состанокот на Комисијата за заразни болести беше донесена одлука до Владата да се препорача укинување на мерките за излез од државата, односно неопходниот негативен ПЦР тест или потврда за вакцинација или прележан вирус. Истовремено беше договорено да се препорача укинување на мерката бремените жени да бидат ослободени од работа.
Комисијата за заразни болести на еден од последните состаноци исто така препорача сетрификатот за прележан Ковид-19, наместо 45 дена да трае 180 дена.
Овие мерки се уште не добиле зелено светло од Владата. Владините портпароли на прашање на НоваТВ велат дека препораките на Комисијата за заразни болести донесени на претходните состаноци, прво треба да бидат одобрени од Кризниот штаб, а се надеваат дека во следните денови ќе бидат разгледувани и на Седница на Владата.
(Б.Божиновска)